30 Setembro, 2024
O Concello de Camariñas, xunto co Concello de Vimianzo e o Concello de Muxía, impulsan o proxecto de reactivación socioeconómica “Revivindo a Costa 2024-2026”, unha iniciativa que ten como obxectivo reactivar a economía dos tres municipios, impulsando o emprendemento, consolidando as empresas e xerando un contexto socioeconómico que free o despoboamento.
Hoxe, venres 27 de novembro, o goberno local de Camariñas presentará no pleno a ratificación dunha solicitude de subvención ao Ministerio para a Transición Ecolóxica e o Reto Demográfico para financiar esta iniciativa, a través da liña para o financiamento de proxectos innovadores para a transformación territorial e a loita contra o despoboamento. A axuda que se solicita é de 176.298,66 euros, dos que os tres concellos aportarán 17.498,68 euros correspondentes aos custes salariais dos Axentes de Desenvolvemento Local encargados de redactar e executar o proxecto.
“Revivindo a Costa” contará con catro liñas de actuación claramente diferenciadas:
Liña 1: desenvolvedora de talento
Preténdese primeiro crear un mapa de talento. É dicir, buscar persoas con talento nos tres municipios, despois expandir ese talento mediante un viveiro no que se lles dará formación; e, por último, presentarllo ás empresas con seminarios de liderado.
Liña 2: centro de emprendemento disruptivo
Crearase un espazo para que as persoas emprendedoras realicen un proxecto empresarial, sempre con formación, adestramento e amosando nichos de mercado locais.
Liña 3: aceleradora para a mellora empresarial
Primeiro farase un obradoiro para facer prosperar aos autónomos e pequenas e medianas empresas; despois crease o chamado cubo de marketing co obxectivo de multiplicar o valor dos produtos da empresa; seguidamente desenvolverase un laboratorio de innovación que inspire o inxenio dos profesionais; e, finalmente, formaranse nas novas tecnoloxías nun centro de intelixencia dixital.
Liña 4: CoBrandingShow
Faranse dúas actividades. A primeira será unha tenda PopUp na que se exhibirán todas as iniciativas das liñas anteriores e a segunda unha xornada chamada DemoDay na que se convidarán aos profesionais e emprendedores a compartir os seus proxectos.
