Camariñas reafirma a súa aposta pola reciclaxe cun novo servizo de recollida de aceite usado porta a porta

19 Xullo, 2021

Co fin de mellorar o servizo de recollida de residuos e de reafirmar a súa aposta pola reciclaxe, o Concello de Camariñas acaba de asinar un novo convenio coa empresa Collecting Oil S.L. Con este acordo, o goberno local porá á disposición da veciñanza un servizo de recollida de aceite usado porta a porta para o seu posterior transporte á planta ou xestor autorizado.  

O concelleiro de Medio Ambiente, Sergio Caamaño, sinala que con esta iniciativa “o Concello busca mellorar a xestión do lixo, garantindo un mellor servizo para a cidadanía e promovendo, ademais, o respecto polo medio ambiente e a reciclaxe”.  

Esta prestación abarcará a recollida e xestión dos seguintes residuos: aceites domésticos (fritidos, conservas, caducados), graxas e manteigas, pilas e baterías, lámpadas (mesmo as de baixo consumo e de tipo LED), electrodomésticos de pequeno tamaño (microondas, torradoras, teléfonos, radios, etc.), consumibles de impresoras, téxtiles e roupa e restos metálicos como, por exemplo, tixolas, moldes, cazarolas, entre outros.     

O día fixado para a recollida, os veciños e veciñas poderán deixar, na porta dos seus domicilios, un recipiente de plástico cos aceites e graxas ou unha bolsa pechada cos residuos domésticos.  

Collecting Oil S.L. comezará, proximamente, a percorrer as vivendas do municipio, onde entregarán un folleto informativo con todos os detalles sobre esta nova prestación. A periodicidade será dunha recollida cada catro meses (realizando, polo menos, tres ao ano).